Banka Raiffeisen dhe Unicef vazhdojnë bashkëpunimin

Në prag të Ditës së Fëmijëve, Raiffeisen Bank në Kosovë dhe UNICEF kanë nënshkruar vazhdimin e Memorandumit të Mirëkuptimit që të bashkëpunojnë edhe për tre vite të tjera për të mbështetur zhvillimin e aftësive dhe fuqizimin e të rinjve, rritjen dhe përfshirjen sociale të fëmijëve me aftësi të kufizuara në arsim dhe nxitjen e zhvillimit të fëmijërisë së hershme.

Në ceremoninë e nënshkrimit morën pjesë Anita Kovacic, Drejtore Ekzekutive e Raiffeisen Bank në Kosovë dhe Nona Zicherman, shefe e zyrës së UNICEF-it në Kosovë.

“Raiffeisen Bank në Kosovë është e përkushtuar të kontribuojë në qëllimet sociale në Arsim dhe shëndetësi për fëmijët, si dhe përfshirjen në punësimin e adoleshentëve dhe të rinjve. Ky Memorandum Mirëkuptimi pasqyron angazhimin tonë dhe partneritetin tonë të gjatë me UNICEF-in. Ne jemi të gatshëm të vazhdojmë të mbështesim UNICEF-in në fushat e prioriteteve tona të përbashkëta”, tha Kovacic.

“Partneriteti me sektorin privat është një përshpejtues kyç për realizimin e të drejtave të fëmijëve, si globalisht ashtu edhe në Kosovë”, tha Zicherman. “UNICEF ka kënaqësinë të thellojë këtë bashkëpunim me Raiffeisen Bank, e cila shfrytëzon njohuritë dhe asetet e të dyja organizatave për të ndihmuar fëmijët e vegjël dhe prindërit e tyre, si dhe u ofron të rinjve në Kosovë më shumë mundësi për të fituar përvojë pune dhe për të zhvilluar aftësi kritike për punë dhe jetë.”