Në fund të vitit 2024, sheshet kryesore të Prishtinës ishin në qendër të festimeve të fundvitit, ku festivali Verë n’Dimën mblodhi njerëz nga i gjithë vendi për të krijuar kujtime të veçanta me familjen dhe miqtë e tyre. Përveç pijeve, ushqimit të shijshëm, patinazhit në akull dhe aktiviteteve të tjera argëtuese, festivali solli edhe muzikë live çdo mbrëmje, me performanca nga artistë vendas. Banka ishte krenare që kontribuoi në krijimin e një atmosfere magjike festive duke qenë sponsori kryesor i festivalit Verë n’Dimën.

Festivali i Teatrove është një ngjarje me rëndësi në Ferizaj, e themeluar para më shumë se 50 vitesh. Përveç programit të pasur me shfaqje teatrale, festivali përfshin edhe panele diskutimi mbi tema që lidhen me teatrin dhe kulturën. Banka ka qenë një mbështetëse e vazhdueshme e këtij festivali ndër vite.

Në vitin 2023, PriFest, një nga ngjarjet më të rëndësishme filmike në vend, shënoi 15-vjetorin e tij. Në Raiffeisen Bank, jemi krenarë që kemi mbështetur rrugëtimin e tij të suksesshëm që nga dita e parë. Festivali ofron një program të pasur filmash dhe aktivitetesh të tjera të lidhura me industrinë e filmit, si workshope dhe diskutime tematike. Përveç kësaj, pjesë e festivalit janë edhe mbrëmjet muzikore, të cilat e bëjnë atmosferën edhe më të gjallë. PriFest mbledh artistë dhe adhurues të filmit nga Kosova, rajoni dhe më gjerë.

I themeluar në vitin 2010, Chopin Piano Fest Prishtina i dedikohet muzikës klasike. Ky festival mbahet çdo vit, zakonisht në pranverë, dhe mbledh artistë të njohur që interpretojnë vepra të mëdha të muzikës klasike për një audiencë të pasionuar pas këtij zhanri. Banka është një partnere e hershme dhe e vazhdueshme e këtij festivali.

Banka ka një bashkëpunim afatgjatë me Galerinë e Arteve të Kosovës, duke theksuar përkushtimin e saj për të mbështetur skenën artistike të vendit. Galeria shërben si një nga qendrat kryesore të shprehjes artistike, duke organizuar shumë ekspozita gjatë gjithë vitit.

Autostrada Biennale është një ekspozitë ndërkombëtare e artit bashkëkohor, e cila organizohet çdo dy vjet që nga themelimi i saj në vitin 2017. Edicioni më i fundit, i mbajtur në vitin 2023, solli aktivitete artistike në Prizren dhe Prishtinë.

Banka jonë bashkëpunoi me ECIKS për të rritur nivelin e edukimit financiar tek Ndërmarrjet e Vogla dhe të Mesme, që përbëjnë shtyllën kryesore të ekonomisë së Kosovës. Përmes workshopeve të organizuara në mbarë vendin, sipërmarrësit u trajnuan në tema kyçe si buxhetimi, planifikimi financiar, investimet dhe kursimet, me theks të veçantë në transparencë dhe deklarimin e qarkullimit, si mënyrë për të ndërtuar besim me bankat dhe për të nxitur rritje të qëndrueshme të bizneseve.

Banka mbështeti edicionin e dytë të Festivalit të Aftësive Digjitale në ITP Prizren, të mbajtur në maj 2024, një ngjarje kyçe që shpalosi përparimin e Kosovës drejt Tranzicionit të Dyfishtë, qëndrueshmëri dhe digjitalizim. Festivali përfshiu workshope, hackathone dhe ligjërata, të ndjekura nga studentë nga e gjithë Kosova. ITP Prizren, i bashkëfinancuar nga qeveritë e Gjermanisë dhe Kosovës dhe i zbatuar nga GIZ, shërben si një qendër rajonale për inovacion, sipërmarrje dhe zhvillim aftësish.

Në prill të vitit 2025, u hap zyrtarisht këndi i ri i lojërave për fëmijë në Parkun e Gërmisë, i cili ofron pajisje të përmirësuara dhe fton fëmijët e familjet të kalojnë më shumë kohë në natyrë.  Projekti u realizua me mbështetjen e bankës, si pjesë e një bashkëpunimi me Komunën e Prishtinës, duke forcuar përkushtimin e bankës ndaj nismave që sjellin përfitime për komunitetin. Kjo nismë ndërtohet mbi bashkëpunimet e mëparshme me komunën, përfshirë mbjelljen e rreth një hektari hapësirë të gjelbër në Bregun e Diellit në vitin 2024.

Si pjesë e aktiviteteve tona vullnetare, shumë kolegë të bankës kaluan një ditë në Liqenin e Badovcit në qershor 2025, duke ndihmuar në shënjimin e shtigjeve të ecjes dhe pastrimin e zonës përreth. Kjo nismë pasqyron përkushtimin tonë të vazhdueshëm ndaj komunitetit dhe kujdesit për mjedisin.

Në vitin 2024, banka mbështeti projektin GreenWings në Prishtinë, një nismë inovative për mbjelljen e pemëve e udhëhequr nga Sustainability Leadership Kosova. Duke përdorur teknologjinë e dronëve, rreth 13,000 fara u shpërndanë në një sipërfaqe prej pesë hektarësh.

Në tetor 2024, në bashkëpunim me Komunën e Prishtinës, banka ndërmori një nismë të gjelbër duke mbjellë pemë dhe gjelbërim në një sipërfaqe prej rreth një hektari në lagjen Bregu i Diellit. Në total, u shtuan 400 pemë dhe bimë, duke e transformuar zonën në një hapësirë tërheqëse dhe mikpritëse për komunitetin. Ky angazhim jo vetëm që përmirëson pamjen estetike të lagjes, por gjithashtu luan një rol të rëndësishëm në uljen e ndotjes.